WALCOTT ALILIA KUCHEZESHWA KATIKATI ENGLAND

LONDON, ENGLAND

THEO Walcott amemwambia kocha wa England, Roy Hodgson: “Nichezeshe fowadi nitawasambaratisha Wabrazil Jumatano.”

Staa huyo wa Arsenal, amemwambia Hodgson kwamba yu tayari kumaliza tatizo la majeruhi kwenye kikosi, na kuanza kwenye safu ya ushambuliaji katika mechi hiyo ya kirafiki itakayopigwa Wembley.

Kukosekana kwa Jermain Defoe na Daniel Sturridge kwa kuwa majeruhi, na Danny Welbeck anayehangaika kumaliza tatizo la nyonga, Hodgson amebaki na Wayne Rooney akiwa mshambuliaji pekee aliye fiti kikamilifu.

Walcott amekuwa kwenye kiwango kizuri Arsenal akiachwa kucheza kulia kwa washambuliaji watatu, lakini ameeleza kwamba amejifua kucheza mbele akiwa na Rooney mazoezini kwenye Uwanja wa St George's Park mwanzoni mwa wiki, na yu tayari kuongoza mashambulizi dhidi ya Brazil.